काठमाडौं, २० चैत । सिरियाको राजधानी दमास्कसमा रहेको इरानको वाणिज्य दूतावासमा आक्रमण हुँदा सैन्य कमाण्डरसहित सात जनाको मृत्यु भएको छ ।
बीबीसीका अनुसार मृत्यु हुनेमा इरानको कुद्स फोर्सका कमाण्डर ब्रिगेडियर जनरल मोहम्मद रेजा जाहेदी, डेपुडी ब्रिगेडिएर जनरल मोहम्मद हादी हाजी रहीमी लगायतका छन् । मोहम्मद रेजा जाहेदी इरानका शीर्ष कमाण्डरमध्येका एक हुन् ।
सोमबार भएको उक्त आक्रमण कसले गरेको हो भन्ने खुल्न नसकेको बीबीसीले जनाएको छ । इरान र इजरायलबीच यस प्रकारको हत्याको इतिहास भए पनि इजरायलबाट हालसम्म कुनै प्रतिक्रिया सार्वजनिक भएको छैन । इजरायलको सेनाले विदेशी मिडियाको रिपोर्टमा कुनै टिप्पणी नगर्ने जनाएको बीबीसीले उल्लेख गरेको छ ।
सीरियाको रक्षा मन्त्रालयले आक्रमण इजरायलले गरेको जिकीर गरेको छ । इजरायली एयरक्राफ्टले गोलान हाइट्सबाट इरानको वाणिज्य दूतावासमा आक्रमण गरेको जनाएको छ । सिरियामा इरानको वाणिज्य दूतावास पश्चिमी मेजास्थित एक हाईवेमा छ । सिरियाले इजरायलका केही मिसाइललाई खसालेको र केहीलाई रोक्न नसकेको पनि जनाएको छ । इरान र सिरिया दुवै सरकारले आक्रमणको निन्दा गरेका छन् ।
इरानी राजदूत होसैन अकबरीले इजरायलको एफ–३५ लडाकु जेट विमानले आक्रमण गरेको जनाएका छन् । उनले सुरुमा इरानका सरकारी मिडियाहरुलाई पाँचदेखि सात जनाको मृत्यु भएको हुनसक्ने बताएका थिए ।
त्यसपछि रिभोल्युशनरी गार्डस्ले विज्ञप्ति जारी गर्दै मोहम्मद रेजा जाहेदी सहित सात अधिकारीको मृत्यु भएको पुष्टि गरेको थियो । जाहेदी सबैभन्दा हाईप्रोफाइल इरानी कमाण्डरको रुपमा चिनिन्छन् ।
