काठमाडौं, २५ चैत । एनआईसी एशिया बैंकका ऋणीले चैत मसान्तसम्मको ब्याज तथा किस्ता बुझाएमा चैतसम्म लाग्ने जरिवाना तथा हर्जना छूट गर्ने भएको छ । बैंकले आइतबार छूटसम्बन्धी योजना सार्वजनिक गर्दै मुलुकमा रहेको आर्थिक शिथिलताका कारण बैंकका कर्जा ग्राहकमा परेको असर न्यूनीकरण गर्न उक्त योजना ल्याइएको जनाएको छ ।
पुस मसान्तमा प्रचलित नियमनकारी व्यवस्थाअनुसार निष्क्रिय कर्जाको रुपमा वर्गीकरण भएका कर्जाहरुको हकमा उक्त योजना लाग हुने बैंकले जनाएको छ । बैंकले भनेको छ, ‘ऋणीले आफ्नो २०८० चैत मसान्तसम्मको ब्याज तथा किस्ता रकम पूर्ण रुपमा चुक्ता भुक्तान गर्नुको साथै सम्पूर्ण कर्जा रकम नै २०८० चैत्र मसान्त भित्र पूर्ण रुपमा चुक्ता भुक्तान गरेमा २०८० चैत्र मसान्तसम्म लाग्ने जरिवाना तथा हर्जाना रकममा शतप्रतिशत छूट र ब्याज रकममा समेत छुट प्रदान गरिनेछ ।’
यस्तै ब्याजमा वर्गीकरणअनुसार कमसलमा १० प्रतिशत, संकास्पदमा १५ प्रतिशत र खराब बर्जामा २० प्रतिशत छूट गरिने बैंकले जनाएको छ । मासिक तथा त्रैमासिक किस्ताबन्दीमा भुक्तानी हुने अथवा बैंकबाट प्रवाह भएका कुनै पनि प्रकारका कर्जामा ग्राहकले उक्त योजनामा सहभागी भई लाभ लिन सक्ने बैंकको भनाइ छ ।
