बागलुङ, २१ भदौ । अविरल वर्षाका कारण पहिरो खस्दा मध्यपहाडी लोकमार्ग अवरुद्ध भएको छ । लोकमार्ग अन्तर्गत खाडुखोला, जिरीखोला, कालापैरा खोला, ठूलाखेत लगायतमा पहिरो खस्दा सडक अवरुद्ध भएको हो ।
लोकमार्ग अवरुद्ध हुँदा निसीखोला, पूर्वी रुकुम, जाजरकोट, रोल्पादेखि पोखरा, काठमाडौं लगायत स्थानमा जाने यात्रु अलपत्र परेका छन् । यसैगरी काठमाडौँ, पोखरा, चितवन, बुटवल लगायत ठाउँबाट तीज मनाउन गाउँ फर्किएका पनि पहिरोले सडक अवरुद्ध हुँदा समस्यामा छन् ।
बिहानसम्म पनि सडक नखुल्दा पूर्वी रुकुम तथा जाजरकोट जाने रात्रि बस पनि बुर्तिबाङमै रोकिएका छन् भने निरन्तर वर्षा भइरहेकै हुँदा सडक खुलाउन समय लाग्ने स्थानिय तहको भनाइ छ ।
