काठमाडौं, १३ मंसिर । चालू आर्थिक वर्ष (आव) २०८१/८२ को पहिलो दुई महिनामा वैदेशिक सहायता प्रतिबद्धता करिब साढे दुई गुणा बढेको छ । अर्थ मन्त्रालयका अनुसार चालू आवको भदौसम्ममा वैदेशिक सहायता प्रतिबद्धता रू. ३७ अर्ब १८ करोड पुगेको छ, जुन गत आवको सोही अवधिको तुलनामा २४९ दशमलव ७६ प्रतिशत बढी हो । गत आवको सोही अवधिमा यस्तो प्रतिबद्धता रू. १० अर्ब ६३ करोड थियो ।
कुल सहायता प्रतिबद्धतामध्ये अनुदानतर्फ रू. २३ अर्ब ७५ करोड ८० लाख अर्थात् ६३ दशमलव ९ प्रतिशत रहेको छ । त्यस्तै ऋणतर्फ रू. १३ अर्ब ४२ करोड १९ लाख अर्थात् ३६ दशमलव १ प्रतिशत छ ।
कुल सहायता प्रतिबद्धतामध्ये १४ अर्ब २७ करोड बराबर अर्थात् ३८ दशमलव ४ प्रतिशत वातावरण क्षेत्रमा प्राप्त भएको छ । त्यस्तै यातायात क्षेत्रमा १३ अर्ब ४२ करोड बराबर अर्थात् ३६ दशमलव १ प्रतिशत, सामाजिक क्षेत्रमा ७ अर्ब ६२ करोड बराबर अर्थात् २० दशमलव ५ प्रतिशत प्राप्त भएको छ । त्यसैगरी अन्य क्षेत्रमा १ अर्ब ८२ करोड बराबर अर्थात् ४ दशमलव ९ प्रतिशत रहेको तथ्यांकमा उल्लेख छ ।
