काठमाडौं, ७ जेठ । चालू आर्थिक वर्ष (आव)को दश महिनामा करिब १७ खर्बको वैदेशिक व्यापार भएको छ ।
भन्सार विभागका अनुसार वैशाख मसान्तसम्ममा १६ खर्ब ९२ अर्ब ९ करोड रुपैयाँको वैदेशिक व्यापार भएको हो, जुन गत आवको यसै अवधिको तुलनामा १८ दशमलव ३७ प्रतिशत बढी हो । गत आवको १० महिनामा १४ खर्ब २९ अर्ब ५३ करोड रुपैयाँको व्यापार भएको थियो ।
गत वैशाखसम्ममा १४ खर्ब ७४ अर्ब १८ करोड रुपैयाँको आयात भएको छ । यो गत आवको यसै अवधिको तुलनामा १३ दशमलव ११ प्रतिशत धेरै हो । सो आवमा १३ खर्ब ३ अर्ब ३५ करोड रुपैयाँको भित्रिएको थियो । यसैगरी निर्यात ७२ दशमलव ७१ प्रतिशतले बढेको छ । गत आवको वैशाखसम्ममा १ खर्ब २६ अर्ब १७ करोड रुपैयाँको निर्यात भएकोमा चालू आवको सोही अवधिमा २ खर्ब १७ अर्ब ९१ करोड रुपैयाँको भएको छ ।
आवको १० महिनामा नेपाललाई १२ खर्ब ५६ अर्ब २७ करोड रुपैयाँ वैदेशिक व्यापार घाटा भएको छ । गत आवमा यस्तो घाटा ११ खर्ब ७७ अर्ब १८ करोड भएको थियो ।
