काठमाडौं, ८ भदौ । नेपालको विदेशी मुद्रा (विदेशी विनिमय) सञ्चिति पौने २७ खर्ब पुगेको छ । नेपाल राष्ट्र बैंकले आइतबार सार्वजनिक गरेको गत आवको वित्तीय विवरण अनुसार गत आवको असार मसान्तसम्ममा २६ खर्ब ७७ अर्ब ६८ करोड पुगेको छ, जुन अघिल्लो वर्षको असारमसान्तको तुलनामा यस्तो सञ्चि ३१ दशमलव २ प्रतिशतले वृद्धि भएको हो । २०८१ असार मसान्तमा २० खर्ब ४१ अर्ब १० करोड बराबर विदेशी विनिमय सञ्चिति थियो ।
अमेरिकी डलरमा यस्तो सञ्चिति २०८१ असार मसान्तमा १५ अर्ब २७ करोड रहेकोमा २०८२ असार मसान्तमा २७.७ प्रतिशतले वृद्धि भई १९ अर्ब ५० करोड पुगेको छ ।
कुल विदेशी विनिमय सञ्चितिमध्ये २४ खर्ब १४ अर्ब ६४ करोड रुपैयाँ नेपाल राष्ट्र बैंकमा छ, जुन २०८१ असार मसान्तको तुलामा ३० दशमलव ६ प्रतिशतले बढी हो । सो अवधिमा १८ खर्ब ४८ अर्ब ५५ करोड विदेशी विनिमय सञ्चिति राष्ट्र बैंकमा थियो ।
त्यस्तै बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति २०८१ असार मसान्तमा १ खर्ब ९२ अर्ब ५५ करोड रुपैयाँ रहेकोमा २०८२ असार मसान्तमा ३६ दशमलव ६ प्रतिशतले बढे २ खर्ब ६३ अर्ब ४ करोड कायम भएको छ ।
२०८२ असार मसान्तको कुल विदेशी विनिमय सञ्चितिमा भारतीय मुद्राको अंश २३.१ प्रतिशत रहेको छ ।
गत आवको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति १८ दशमलव २ महिनाको वस्तु आयात र १५ दशमलव ४ महिनाको वस्तु तथा सेवा आयात धान्न पर्याप्त रहने देखिएको राष्ट्र बैंकले बताएको छ ।
२०८२ असार मसान्तमा विदेशी विनिमय सञ्चितिको ४३.८ प्रतिशत कुल गार्हस्थ्य उत्पादन, १२८.१ प्रतिशत कुल आयात र ३४.१ विस्तृत मुद्राप्रदाय रहेका छन् । २०८१ असार मसान्तमा उक्त अनुपातहरू क्रमशः ३५.८ प्रतिशत, १०८.६ प्रतिशत र २९.३ प्रतिशत रहेका थिए ।
