काठमाडौं, ११ चैत । नेपालमा सुनको आयात पछिल्लो ५ महिनायता लगातार बढिरहेको छ । भन्सार विभागका अनुसार चालू आर्थिक वर्षको साउनदेखि बढेको सुनको आयात परिमाण भदौ र असोजमा स्थिर रहेकोमा त्यसपछिका महिनामा भने बढिरहेको छ ।
विभागको तथ्याङ्क अनुसार गत फागुनसम्ममा १४ अर्ब ३७ करोड ११ लाख रुपैयाँ बराबरको ११ लाख ८८ हजार ८९६ ग्राम अर्थात् १ हजार १८८ किलो सुन आयात भएको छ । पछिल्लो एक महिनामै ३ लाख १ हजार ५६८ ग्राम अर्थात ३०१ किलोग्राम (किलो) सुन भित्रिएको छ । माघसम्ममा १० अर्ब ४५ करोड ४९ लाख रुपैयाँ बराबरको ८ लाख ८७ हजार ३२८ ग्राम अर्थात् ८८७ किलो सुन आयात भएको थियो ।
चालू आर्थिक वर्षको पहिलो महिना साउनको तुलनामा फागुनसम्ममा सुनको आयात परिणामको हिसाबले करीब ११ गुणा बढेको छ । गत साउनमा १ अर्ब ४ करोड २७ लाख रुपैयाँ बराबरको १ लाख १०५ ग्राम अर्थात् एक सय किलो सुन आयात भएको थियो ।
चालू आवको ८ महिनामा सुन आयातबाट सरकारले १ अर्ब ५८ करोड १० लाख रुपैयाँ राजस्व संकलन गरेको छ ।
विशेषगरी पछिल्ला तीन महिनामा सुनको आयात वृद्धि उच्च छ । गत पुसको तुलनामा माघमा सुनको आयात ३ लाख १ हजार २४९ अर्थात् ३०१ किलो धेरै भित्रिएको छ । पुस मसान्तसम्ममा ६ अर्ब ७१ करोड ६ लाख रुपैयाँ बराबरको ५ लाख ८६ हजार ७९ ग्राम अर्थात ५८६ किलो भित्रिएको थियो, जुन मंसिर महिनाको तुलनामा ४ सय किलो बढी हो ।
साउनदेखि फागुनसम्मको सुन आयात
स्रोत : भन्सार विभाग
