काठमाडौं, १ चैत । प्रतिनिधि सभाका सदस्य तथा नेपाल किसान मजदुर पार्टी (नेमकिपा) का नेता प्रेम सुवालले बजेटको सिद्धान्त तथा प्राथमिकता खारेज गर्न सरकारसँग माग गरेका छन् । नेपाली काँग्रेसका अर्थमन्त्री डा.प्रकाशशरण महतले ल्याएको आगामी आर्थिक वर्ष, २०८१÷८२ को बजेटको सिद्धान्त तथा प्राथमिकता खारेज गर्न सभामुखमार्फत सांसद सुवालले सरकारसँग माग गरेका हुन् ।
बिहिबार प्रतिनीधि सभामा सांसद सुवालले अर्थमन्त्रीको नेतृत्व फेरिएसँगै काँग्रेसले ल्याएको बजेटको सिद्धान्त तथा प्राथमिकता फेरिनुपर्ने बताए ।
गत फागुन १४ गते निवर्तमान अर्थमन्त्री डा महतले आगामी आर्थिक वर्षको बजेटको विनियोजन विधेयक, २०८१ को सिद्धान्त तथा प्राथमिकता सङ्घीय संसद्को संयुक्त बैठकमा पेस गरेका थिए ।
उक्त विधेयकमाथि छलफल नहुँदैै नेपाली काँग्रेस नेतृत्वको सत्ता समीकरण भत्किएर नेकपा माओवादी केन्द्र, नेकपा एमाले, राष्ट्रिय स्वतन्त्र पार्टी (रास्वपा), एकीकृत समाजवादी पार्टी र राष्ट्रिय जनता समाजवादी पार्टी (राजपा) को नयाँ सत्ता समीकरणमा सरकार बनेको छ । नेकपा माओवादीका अध्यक्ष प्रचण्डले नेतृत्व गरेको सरकारको अर्थमन्त्रीमा हाल पार्टीकै उपमहासचिव वर्षमान पुन छन् ।
