काठमाडौं, ७ कार्तिक । नेपाल प्रिमियर लिग (एनपीएल)का लागि काठमाडौं गुर्खाजले नेदरल्याण्ड्सका ब्याटर माइकल लेभिटलाई अनुबन्ध गरेको छ ।
(एनपीएल टोलीले बुधबार सामाजिक सञ्जालमार्फत लेभिटलाई अनुबन्ध गरेको जानकारी दिएको छ ।
यससँगै लेभिटले अब मंसिर १५ देखि पुस ६ गतेसम्म आयोजना हुने पहिलो संस्करणको एनपीएल गुर्खाजबाट खेल्नेछन् ।
लेभिटले एक भिडिओ सन्देशमार्फत गुर्खाज परिवारमा सहभागि हुनु पाउँदा गर्व लागेको र गोर्खे शैलीमा लडेर क्रिकेट मैदानमा इतिहास रच्ने बताएका छन् ।
काठमाडौंले लेभिटलाई पहिलो विदेशी खेलाडीको रुपमा अनुबन्ध गरेको हो । लेभिट एनपीएलका लागि अनुबन्ध हुने दोस्रो डच खेलाडी हुन् । यसअघि पोखरा एभेन्जर्सले अलराउण्डर बास डे लिडलाई अनुबन्ध गरिसकेको छ ।
२१ वर्षीय युवा ब्याटर लेभिटले नेदरल्याण्ड्सका लागि ८ ओडिआई र १७ टी–२०आई खेल खेलिसकेका छन् । टी–२० आईमा उनले एक शतक र ४ अर्धशतक प्रहार गरेका छन् । जसमा उनको उच्च स्कोर १३५ रन हो । उनी पार्ट टाइम बलिङ पनि गर्छन् ।
लेभिटले गत फेब्रुअरीमा कीर्तिपुरमा नेपालविरुद्ध खेल्दै टी–२०आईमा डेब्यु गरेका थिए । उनलाई कीर्तिपुर मैदान खेलेको अनुभव समेत छ ।
